Alexander-Arnold yerekeje muri Real Madrid nyuma y’imyaka 20 akinira Liverpool, atangaza ko kuva kera yari yarahisemo ko ari yo kipe yonyine ashobora kuvamo agana ahandi. Mu ijambo rye ryo kumurangira, yatangaje ko ari inzozi zabaye impamo, kandi ko atigeze atekereza ku yindi kipe uretse Madrid.
Kujya muri Real Madrid ntabwo bibaho buri munsi. Ni inzozi zabaye impamo,” yavuze mu rurimi rw’Igisipanyolo, ashimira umutoza w’iyi kipe ndetse n’umuyobozi wayo Florentino Pérez.
Alexander-Arnold, w’imyaka 26, yasinyanye amasezerano y’imyaka itandatu na Real Madrid, aho yiteguye guhatana ku rwego rwo hejuru mu marushanwa atandukanye. Yagaragaje ko yizeye ko iyi mpinduka izamufasha gukura mu mikino ye no kugera ku nzozi ze zo gukina ku rwego rw’isi. Mu ijambo rye, yavuze ko Real Madrid ari ikipe ifite amateka akomeye cyane, kandi yiteguye kwiga no gukura mu buryo bw’umwuga ku ikipe ifite abakinnyi bakomeye n’umutoza w’inararibonye. Perezida wa Real Madrid, Florentino Pérez, yamushimiye nk’umwe mu bayobozi beza, kandi yashimangiye ko azaba inyongera ikomeye ku ikipe.
Alexander-Arnold yari amaze imyaka 20 akinira Liverpool, aho yigaragaje nk’umwe mu bakinnyi beza mu mwanya we. Ubu yerekeje muri Real Madrid, aho izamwifashisha mu marushanwa akomeye harimo n’igikombe cy’isi cy’amakipe (FIFA Club World Cup), aho biteganyijwe ko azahita atangira gukina.
Azambara nomero ya 12, ikaba yarambarwaga na Marcelo mbere ye, umukinnyi wari ukomeye muri Real Madrid. Iyi mpinduka ni intambwe ikomeye mu rugendo rwe rw’umwuga, kandi abafana bategereje kureba imikinire ye mishya mu ntego za Real Madrid zo gutwara ibikombe byinshi.
